“Дзеці Эйнштэйна” на Століншчыне
01.02.2016З 26 па 29 студзеня дэлегацыя Беларускага дзяржаўнага педагагічнага ўніверсітэта імя Максама Танка з 29 чалавек наведала Століншчыну ў межах 51-га Зорнага паходу, прысвечанага Году культуры. У склад дэлегацыі ўвайшлі выкладчыкі вышэйшай навучальнай установы, студэнты 1-5 курса фізіка-матэматычнага факультэта “Дзеці Эйнштэйна”, выпускнікі і маладыя настаўнікі, якія праявілі сваю ініцыятыву і накіраваліся на Палессе.
Першым прыпынкам “Дзяцей Эйнштэйна” стала наведванне Столінскага аграрна-эканамічнага каледжа, дзе яны сустрэліся з навучэнцамі дадзенай установы і выступілі перад імі з канцэртнай праграмай. Са словамі падзякі да гасцей звярнуўся начальнік аддзела адукацыі, спорту і турызму Аляксандр Мікалаевіч Вячорка. А пасля госці наведалі спартыўны комплекс “Аквамарын”.
Удзельнікі Зорнага паходу падчас свайго візіту на Століншчыну наведалі звыш 15 устаноў адукацыі, сустрэліся са старшакласнікамі, выступілі ў школах з прафарыентацыйнымі канцэртнымі праграмамі, наведалі Цэнтр драўлянай скульптуры І. П. Супрунчыка, музей сярэдняй школы № 2 г. Давыд-Гарадка, Столінскі краязнаўчы музей, наведалі ветэрана Вялікай Айчыннай вайны, правялі таварыскую сустрэчу ў “Аквамарыне” па валейболе з ветэранамі спорту раёна. Сустрэчы ва ўстановах адукацыі былі насычаны трэнінгавымі праграмамі і майстар-класамі. Пазнаёміліся яны і з перыядам ваенных ліхалеццяў на тэрыторыі нашага раёна, наведалі месцы баявой славы: правялі мітынгі і ўсклалі кветкі воінам-вызваліцелям г. Давыд-Гарадка і г. Століна, а таксама ва ўрочышчы Стасіна.
Свой заключны канцэрт 29 студзеня ўдзельнікі 51-га Зорнага паходу правялі ў гарадскім Доме культуры для вучняў старэйшых класаў г. Століна, р. п. Рэчыца, в.Струга, в.Белавуша і в.Церабяжоў. Усё было прадумана да дробязяў, і выглядала так ярка, незвычайна і цікава, што, пэўна, яшчэ не раз усплыве ў памяці абітурыентаў, якія па-іншаму паглядзелі на АlmaMater студэнтаў фізіка-матэматычнага факультэта, якія пераадолелі сотні кіламетраў і цяпер з гонарам і любоўю гаварылі пра перавагі вышэйшай навучальнай установы са сцэны. Разнапланавыя творчыя нумары харызматычных, упэўненых ў сабе і вясёлых маладых людзей запалілі ў сэрцах заўтрашніх выпускнікоў агеньчыкі, якія яшчэ доўга будуць гарэць прадстаўленай магчымасцю па-іншаму паглядзець на прафесію настаўніка, на тое, якім ён можа быць - малады настаўнік і выпускнік БДПУ імя Максіма Танка. “Дзеці Эйнштэйна” на адным дыханні правялі прафарыентацыйны блок з падарункамі для ўдзельнікаў сустрэчы: ручкі, буклеты, фірменныя кубкі з лагатыпам установы, перыядыны ўніверсітэцкі друк і выкарыстанне сімволікі ў спалучэнні з талентам студэнтаў, якія танцавалі, спявалі, паказвалі своё акторскае майстэрства і пазітыўны настрой, які спалучаўся з сапраўдным камандным духам і гумарам прадстаўнікоў зборнай каманды КВЗ “Лепшыя сябры”, проста зачаравалі гледачоў.
Галоўны спецыяліст аддзела адукацыі, спорту і турызму Алена Антонаўна Ардашэўская падзякавала гасцям за такі нечаканы і вельмі прыемны візіт, за тую значную работу, якая была праведзена ў школах раёна, за цёплыя словы і той пазітыў, які прывезлі з сабою госці. Яна ад імя старшыні райвыканкама Рыгора Васільевіча Пратасавіцкага ўручыла віншавальны адрас, а лепшаму гульцу – кубак за перамогу, якую атрымала каманда БДПУ падчас таварыскай сустрэчы з ветэранамі спортураёна. Кожны ўдзельнік 51-га Зорнага паходу атрымаў невялічкі сувенір на памяць пра наведванне Століншчыны.
Загадчык вучэбна-метадычнага кабінета аддзела адукацыі, спорту і турызму Валянціна Аляксандраўна Грэчка адзначыла, што дадзенае мерапрыемства настолькі спадабалася дзецям і натаўнікам, што ў метадычны кабінет не перастаюць паступаць тэлефонныя званкі са словамі падзякі ад адміністрацыі навучальных устаноў.
51 Зорны паход студэнтаў і выкладчыкаў БДПУ імя Максіма Танка стаў адной з самых яскравых, значных і цікавых формаў грамадзянска-патрыятычнага, культурна-асветніцкага і прафесійнага выхавання моладзі нашага раёна на прыкладзе работы, якая была праведзена гасцямі на працягу чатырох дзён, якія яны правялі на Палессі і адзначылі, што былі проста ўражаны гасціннасцю, самабытнасцю, прыгажосцю і непаўторнасцю нашага краю.
Даведачна:
Ідэя правядзення зорных паходаў нарадзілася ў 1966 годзе, калі студэнты Мінскага педагагічнага інстытута прынялі ўдзел ва Усесаюзным паходзе моладзі па месцах рэвалюцыйнай, баявой і працоўнай славы савецкага народа. Асноўная мэта заключалася ў тым, каб пазнаёміць моладзь прадстаўнікоў усіх саюзных рэспублік з дасягненнямі, жыццём, культурай і побытам народа. Удзельнікі паходу накіраваліся ў розныя населеныя пункты Радзімы, а фінішавалі ўсе групы адначасова ў адным месцы. На карце схема такога маршруту па форме нагадвала зорку, што і дало назву зімоваму паходу – “Зорны”. Гэтая традыцыя стала пачаткам зараджэння інстытуцкага турыстычнага клуба, таму штогадова пасля паспяховай здачы зімовай сесіі студэнты і выкладчыкі едуць у чарговы зорны паход.
У 2016 годзе сем атрадаў лепшых студэнтаў БДПУ імя Максіма Танка, агульнай колькасцю больш за 200 чалавек, 51 раз накіраваліся ў падарожжа па краіне і наведалі Маладзечанскі, Барысаўскі, Браслаўскі, Пухавіцкі, Асіповіцкі, Столінскі і Старадарожскі раёны.
Людміла КАСПЯРОВІЧ