Клубу “Натхненне” - 10 гадоў
23.12.2015Мы гаворым душой
Клуб “Натхненне” быў утвораны 10 гадоў таму па ініцыятыве аддзела адукацыі, спорту і турызму Столінскага раёна. Арганізатарамі выступілі начальнік аддзела адукацыі Надзея Уладзіміраўна Драко і загадчык вучэбна-метадычнага кабінета Валянціна Аляксандраўна Грэчка.
На пачатку свайго функцыянавання клуб “Натхненне” аб’яднаў творча працуючых настаўнікаў раёна, якія пісалі вершы і празаічныя творы, малявалі карціны, спявалі, - словам, мелі пэўныя задаткі да творчасці. Кіраўніком клуба стала намеснік дырэктара па выхаваўчай рабоце, настаўнік рускай мовы і літаратуры Столінскай дзяржаўнай гімназіі Таццяна Якаўлеўна Жук.
- Сёння аснову клуба складаюць паэты і пісьменнікі з ліку настаўнікаў раёна, - расказвае Таццяна Якаўлеўна. - 11 чалавек-удзельнікаў клуба засталіся вернымі свайму натхненню і паэтычнаму радку. Тамара Міхайлаўна Павядайка і Марыя Аляксандраўна Акостка пайшлі на заслужаны адпачынак, але захавалі адданасць пачатай справе і таму актыўна наведваюць клуб і зараз.
Членам “Натхнення” за гонар тое, што ў іх склад уваходзяць два члены Саюза беларускіх пісьменнікаў – настаўнік гісторыі сярэдняй школы № 1 г. Давыд-Гарадка Віктар Васільевіч Вабішчэвіч і настаўнік музыкі Мачульскай базавай школы Ірына Мікалаеўна Ляшкевіч, а таксама член Саюза пісьменнікаў Беларусі, настаўнік пачатковых класаў Мачульскай базавай школы Галіна Сідараўна Бабарыка. Значным дасягненнем з’яўляецца той факт, што Віктар Вабішчэвіч - аўтар зборнікаў “Чорны боль”, “Кахаю і люблю”, “Уражанне” і “ORBІ”. Галіна Бабарыка выдала зборнік паэзіі “Давер”, а зусім нядаўна адбылася прэзентацыя другога зборніка аўтаркі “Дарога ў восень”. “Сувой” – гэта зборнік Ірыны Ляшкевіч.
Традыцыйна паседжанні клуба адбываюцца чатыры разы за год. За перыяд існавання “Натхнення” паэты абмяркоўвалі самыя разнастайныя тэмы: “Асеннія мелодыі”, “Пішу пра тое, што сэрцу міла”, “Мая цярплівая добрая маці”, “Вясна прынесла натхненне”, “Прырода роднага краю”, “Зімовыя матывы”, “Вайна была і ў памяці жыць будзе” і многія іншыя.
Па запрашэнні загадчыка метадычнага кабінета Пружанскага раёна паэты прынялі ўдзел у рабоце метадычнага аб’яднання настаўнікаў беларускай мовы і літаратуры, а таксама музыкі на базе сярэдняй школы № 5 г. Пружаны. Пакінула свой след у памяці сустрэча з паэтамі Украіны. Члены клуба “Натхненне” прынялі ўдзел у другім калядным рэспубліканскім фестывалі педагагічнага майстэрства ў г. Мінску. Перыядычна адбываюцца сустрэчы з паэтамі-землякамі, цікавымі і вядомымі людзьмі краіны. Таццяна Жук адзначае, што паэты – людзі вельмі чулыя, таму падчас пасяджэнняў клуба пануе атмасфера дабразычлівасці, нездарма сімвалам аб’яднання з’яўляецца свечка, якая сагравае душу. Пачуццё адкрытасці і даверу стварае ўражанне, што гутарка ідзе не словамі, а душамі, і пасля размовы хочацца ўзняцца і паляцець увысь, наталіць душу трапным паэтычным радком з дасканала выверанай страфой.
Кіраўнік клуба адзначыла, што члены аб’ яднання не збірацца замыкацца ў сабе і выказала пажаданне бачыць у ліку сваіх сяброў і аднадумцаў новых творчых, крэатыўных і таленавітых педагогаў з новымі ідэямі і цікавымі задумкамі, каб “Натхненне” змагло ахапіць большае кола сваіх прыхільнікаў. А яшчэ ў планах адкрыць клуб і для вучняў, бо няспынны рух і праца над сабой, а таксама з вучнямі, якія маюць да гэтага адпаведны інтарэс, абавязкова знойдзе адбітак і дасць станоўчы вынік дзейнасці.
Людміла КАСПЯРОВІЧ