Каб прыляцеў хрустальны журавель
16.2.2015У пятніцу, 13 лютага, на базе Столінскай дзяржаўнай гімназіі прайшоў раённы фінал конкурсу педагагічнага майстэрства “Малады настаўнік года”.
Прыгожым лірычным адступленнем пачынаецца гэтае мерапрыемства, якое ўжо даўно з разраду конкурсаў перайшло ў разрад святаў. Вядучая расказвае легенду пра тое, як Бог стварыў настаўніка. А пасля на сцэну пад апладысменты ў суправаджэнні галантных кавалераў падымаюцца самі фіналісты – настаўніца гісторыі Гараднянскага НПК яслі-сад СШ Юлія Сяргееўна Вярэніч, настаўніца англійскай мовы СШ № 2 г. Століна Ала Сяргееўна Сімончык, настаўніца беларускай мовы і літаратуры Харомскага НПК яслі-сад СШ Ганна Васільеўна Трухановіч, настаўніца нямецкай мовы Альгомельскага НПК яслі-сад СШ Святлана Іванаўна Міхалевіч, настаўніца англійскай мовы СШ № 3 г. Століна Ірына Сяргееўна Круг і настаўніца матэматыкі Столінскай гімназіі Ірына Валер’еўна Пачко. З рук у рукі яны перадаюць цеплыню сваёй прафесіі, якую сімвалізуе свечка, і дзякуюць Богу за вучняў, жыццё, прафесію.
Сёлета на ўдзел у раённым этапе конкурсу прафмайстэрства было пададзена 12 заявак. Педагогі пісалі эсэ, прайшлі псіхолага-педагагічнае тэсціраванне, давалі адкрытыя ўрокі. Журы выбрала самых творчых, актыўных, адукаваных настаўнікаў, якія і падняліся на сцэну.
Адкрываючы мерапрыемства, начальнік аддзела адукацыі, спорту і турызму Столінскага райвыканкама Аляксандр Мікалаевіч Вячорка адзначыў, што мэта такіх конкурсаў – падтрымаць ініцыятыўных і таленавітых маладых людзей, даць ім магчымасць для самарэалізацыі. Яшчэ ён адзначыў, што яго не паідае ўпэўненасць: хрустальны журавель абавязкова прыляціць на Століншчыну.
Першы конкурс – знаёмства праз самапрэзентацыю – паказаў, наколькі творчыя і смелыя фіналісты, як яны ўдала падыходзілі да раскрэцця тэмы задання “Я - настаўнік …”. Юлія Сяргееўна Вярэніч зняла відэафільм пра сябе ў некалькіх вобразах: яна – студэнтка (у мінулым), яна – настаўніца (зараз) і яна – дырэктар (у будучыні). Ала Сяргееўна Сімончык таксама праз відэафільм цікава данесла сваю задачу: як рэалізавацца ў штодзённым жыцці. Ганна Васільеўна Трухановіч на шляху да сваёй педагагічнай дзейнасці была зачаравана, і толькі добрая фея дапамагла ёй вярнуць голас і зноў стаць педагогам. Святлана Іванаўна Міхалевіч прадэманстравала лірычны талент і вельмі прыгожа расказала пра сваю школу, якая з’яўляецца для яе другім домам, а пасля выканала песню. З рэпа пачалося выступленне Ірыны Сяргееўны Круг. Яе вучні чыталі рэп пра сваю любімую настаўніцу, якая ў іх “у рытуале”. А пасля сама педагог гаварыла пра любімую прафесію, павышэнне ведаў, пошук, навучанне праз гульню. Прыгожым было яе параўнанне работы з пазламі, якія можна па-рознаму скласці і атрымаць цікавы вынік. Пра Ірыну Валер’еўну Пачко таксама спявалі вучаніцы “Об отличной девчонке Ире, которая не знает ни выходных, ни праздников”, а пасля сама настаўніца расказала аб сваёй педагагічнай дзейнасці.
У конкурсе “Размінка” фіналісты павінны былі прадэманстраваць сваю эрудыцыю і адказаць на шэсць пытанняў з розных сфер. З ім усе справіліся бліскуча і атрымалі максімальную колькасць балаў. Конкурс “Настаўнік, ты – Цыцэрон” паказаў аратарскія здольнасці ўдзельнікаў. Яны выцягнулі паперкі з выказваннямі вялікіх людзей і развілі тэму. На падрыхтоўку было дадзена дзве мінуты.
У апошнім конкурсе фіналісты расказвалі пра сваё хобі. У кожнага з іх ёсць любімы занятак, якому яны прысвячаюць свой вольны час. Ірына Валер’еўна Пачко расказала, як яна стварае інтэлектуальныя карты, каб пабудаваць сваё жыццё. Гэты занятак дапамагае развіваць інтуіцыю, крытычнае мысленне і памяць. Ірына Сяргееўна Круг любіць маляваць, спяваць з вучнямі і падарожнічаць. Юлія Сяргееўна Вярэніч паказала свае навыкі ў цырульніцкай справе. Некалькі мадэляў з яе прычоскамі выйшлі на сцэну. Святлана Іванаўна Міхалевіч спявае, піша вершы, але самы любімы занятак – прыгатаванне страў. Да конкурсу яна зрабіла торт, упрыгожаны флагамі Беларусі і Германіі. Абараняючы сваё хобі, яна гаварыла аб важнасці міру паміж народамі. Ала Сяргееўна Сімончык любіць падарожнічаць і разам з тым захапляецца нацыянальнымі стравамі тых краін, у якіх пабывала. Яна ўжо гатавала нацыянальныя стравы Украіны, Балгарыі, Іспаніі, Нідэрландаў, а французскай выпечкай пачаствала журы. Сваё захапленне вышыўкай Ганна Васільеўна Трухановіч пераняла ад бабулі. Яго яна перадае і сваім вучням.
Паміж конкурсамі для гледачоў музычныя нумары падрыхтавалі вучні СШ № 2 р. п. Рэчыца Ганна Харавец, Вікторыя Бейна, Алена Леанавец, Вольга Кірдзей, Насця Цупа, Карына Кужко, Насця Крыжык, Яўген Пешка, Дар’я Гізун, Вікторыя Дзенісовіч, Алена Гарагляд, а таксама вучні СШ № 2 г. Століна Вольга Муратава і Насця Валадкевіч.
Аляксандр Мікалаевіч Вячорка ўручыў дыпломы аддзела адукацыі ўсім удзельнікам конкурсу, а фіналісты атрымалі ганаровыя граматы з намінацыямі. Усе яны ўжо сталі пераможцамі конкурсу прафмайстэрства. У намінацыі “Разумнае. Добрае. Вечнае” перамагла Ганна Васільеўна Трухановіч, “Навучанне з захапленнем” – Юлія Сяргееўна Вярэніч, “Сэрца аддаю дзецям” – Святлана Іванаўна Міхалевіч, “Натхненне і педагагічны артыстызм” – Ала Сяргееўна Сімончык, “Ініцыятыва. Творчасць. Навізна” - Ірына Валер’еўна Пачко, а пераможцай стала Ірына Сяргееўна Круг.
На развітанне фіналісты разам выканалі песню “Кусочек сердца отдавать кому-то – такая, брат, у нас с тобой работа”.
Таццяна СЕГЕН